काठमाडौँ । बागमती प्रदेशमा बिहीबार सार्वजनिक बिदा परेको छ । प्रदेश सरकारले बिहीबार (बैशाख २४ गते) प्रदेशभर सार्वजनिक बिदा दिने निर्णय गरेको हो । 

बिहीबार प्रदेश सरकारको सरकारी कामकाजको भाषा सम्बन्धी दिवस परेकोले सोही दिवसको अवसरमा प्रदेशभर सार्वजनिक बिदा दिने निर्णय गरिएको बागमती प्रदेश सरकार अन्तर्गतको आन्तरिक मामिला तथा कानून मन्त्रालयले जनाएको छ । 

सार्वजनिक बिदा परेसँगै बिहीबार प्रदेशभर सरकारी कार्यालय, शैक्षिक संस्था, सार्वजनिक संस्थान, बैंक तथा वित्तीय संस्था पनि बन्द रहने भएका छन् । 

यता बिहीबार बागमती प्रदेशभर सार्वजनिक बिदा परे पनि नेपाल स्टक एक्सचेञ्ज (नेप्से) भने खुला रहने भएको छ ।

संघीय सरकारले दिने बिदा बाहेक अन्य बिदामा नेप्से बन्द नहुने नेप्सेका प्रवक्ता मुराहरी पराजुलीले बताएका छन् । ‘बिहीबार नेप्से खुला नै रहन्छ ।’, अर्थ सरोकारसँग कुराकानी गर्दै उनले भने, ‘संघीय सरकारले दिएको बिदा बाहेक अरु बिदामा नेप्से बन्द हुँदैन ।’