काठमाडौँ । भारतको दिल्लीबाट चोरी गरेर नेपाल भित्र्याइएको हिरामोती र अन्य गरगहना तथा नगद गरेर दुई करोड मूल्य बराबरको सम्पत्ति नेपाल प्रहरी सुदूरपश्चिम प्रदेश कार्यालयले बरामद गरेको छ ।

तीन महिना अघि (फागुन १३ गते) भारतको दिल्ली स्थित राजेन्द्रनगरका संजयकुमार माखीजाको घरबाट करोडौँको धनसम्पति चोरी गरेर बाजुराको बुढीगंगा नगरपालिका-१० का उपेन्द्र रावतसहितको टोली फरार थियो । प्रदेश प्रहरी कार्यालय धनगढीका प्रहरी निरीक्षक महेश शाहीका अनुसार संजयकुमार मखजीले नेपाल प्रहरीमा उजुरी गरेपछि घटनाको अनुसन्धान सुरु गरिएको थियो ।

सो क्रममा प्रहरीले उपेन्द्र रावतसहित बाजुराको खप्तड छान्ना गाउँपालिका-३ का लोकेश धामी र अछामको साँफेबगर नगरपालिका-४ का अर्जुन सुनारलाई पक्राउ गरेको प्रहरी निरीक्षक शाहीले बताए ।

‘लामो अनुसन्धानपछि उनीहरुलाई विभिन्न स्थानबाट पक्राउ गरेका हौँ,’ शाहीले भने, ‘गरगहना र नगद उनीहरुले आफन्तको घरमा राखेका थिए । अहिले बरामद गरेर उजुरीकर्तालाई बुझाएका छौँ ।’, शाहीले भने । पक्राउ परेका तीन जनाबाट गरगहनासहित दुई करोड सात लाख बरामद गरिएको शाहीले बताए ।

प्रदेश प्रहरी कार्यालयले विभिन्न जिल्ला प्रहरी कार्यालयसँग साझेदारी गरेर अनुसन्धान गरिएको थियो । हालसम्म हिरामोती, सुनचाँदीका गरगहना, विभिन्न कम्पनीका घडी, नेपालसहित विभिन्न देशका मुद्रा समेत गरी दुई करोड १० लाख भन्दा बढि मूल्य बराबरको सामान बरामद गरिएको प्रदेश प्रहरी कार्यालय धनगढीका प्रमुख डिआइजी ओमबहादुर रानाले जानकारी दिएका छन् ।

रानाका अनुसार तीन जनाबाट नेपाली रुपैयाँ एक करोड ३४ लाख पर्ने १२ वटा घडी, ४३ लाख ३३ हजार १४५ बराबरको विभिन्न सुनका गरगहना, १५ लाख ५६ हजार बराबरको हिरा र सुनका रिङ, दुई लाख १५ हजार ५३० का चाँदीका गरगहना तथा तीन लाख बराबरको सुन बरामद गरिएको छ । यस्तै, १२ लाख ९० हजार नेपाली रुपैयाँ समेत उनीहरुको साथबाट बरामद गरिएको रानाले जानकारी दिए । बरामद गरिएको नगद र विभिन्न देशका मुद्रा सम्बन्धित व्यक्तिलाई बुझाइएको छ ।

मुख्य आरोपी अझै फरार
प्रदेश प्रहरी कार्यालय धनगढीका अनुसार चोरीमा संलग्न मुख्य आरोपी भने अझै फरार छन् । हाल बरामद गरिएको सम्पत्ति भन्दा अझै धेरै चोरीको सम्पत्ति ती व्यक्तिसँग हुने अनुमान प्रहरीले गरेको छ ।

‘हामी मुख्य आरोपीको खोजी गरिरहेका छौँ ।’, प्रदेश प्रहरी कार्यालय धनगढीका प्रहरी निरीक्षक महेश शाहीले भने, ‘अनुसन्धान जारी रहेको छ, सायद छिट्टै ती व्यक्ति पनि समातिन सक्छन् ।’ मुख्य आरोपी भनिएका व्यक्तिको परिचय भने प्रहरीले गोप्य राखेको छ ।