काठमाडौँ । परीक्षा सुरु हुनुअघि नै प्रश्नपत्र ‘आउट’ गरेको अभियोगमा दुई जना पक्राउ परेका छन् । कक्षा १२ को परीक्षा सुरु हुनुअघि नै प्रश्नपत्र र त्यसको उत्तर सामाजिक सञ्जालमार्फत सार्वजनिक गरेको अभियोगमा ३७ वर्षीय निराजन शाही र ३० वर्षीय प्रेमकुमार श्रेष्ठ पक्राउ परेका हुन् ।

सुर्खेतको विरेन्द्रनगर नगरपालिका-८ घर भई हाल काठमाडौँको सुविधानगर बस्दै आएका शाही र धादिङको निलकण्ठ नगरपालिका-३ घर भई हाल कपन बस्दै आएका श्रेष्ठलाई सोमबार पक्राउ गरिएको नेपाल प्रहरीको साइबर ब्युरोले जनाएको छ । 

ब्युरोका अनुसार उनीहरुलाई राष्ट्रिय परीक्षा बोर्डले गरेको पत्राचारका आधारमा पक्राउ गरिएको हो । प्रहरीले गरेको प्राविधिक विश्लेषण र अनुसन्धानबाट उनीहरुले प्रश्नपत्र र त्यसको उत्तर सामाजिक सञ्जालमार्फत सार्वजनिक गर्ने गरेको पुष्टि भएको छ । 

उनीहरुले ‘क्लास १२ म्यानेजमेन्ट अन्ली’ नामक ह्वाट्सएप ग्रुप र मेसेन्जर ग्रुप बनाएर प्रश्नपत्र ‘आउट’ गर्ने गरेको प्रहरी अनुसन्धानबाट खुलेको छ । हाल पक्राउ परेका दुवैजनामाथि जिल्ला अदालत काठमाडौँबाट ४ दिनको म्याद थप गरी ‘विद्युतीय कारोबार ऐन, २०६३’ अन्तर्गतको कसुरमा अनुसन्धान अघि बढाइएको प्रहरीले जनाएको छ ।