काठमाडौँ । अध्ययन बिदाको दुरुपयोग गर्ने ४४ जना प्राध्यापकले ११ करोड रकम फिर्ता गरेका छन् । त्रिभुवन विश्वविद्यालयबाट अध्ययन बिदा लिएर पुनः काममा नफर्किएका ४४ जना प्राध्यापकले ११ करोड रुपैयाँ फिर्ता गरेका हुन् । 

डा. जीवन काफ्लेको संयोजकत्वमा गठित समितिले त्रिविका ३ सय ९८ जना प्राध्यापकले बिदाको दुरुपयोग गरेको प्रतिवेदन तयार गरेको थियो । 

सोही प्रतिवेदनका आधारमा त्रिविले अध्ययन बिदाको दुरुपयोग गर्ने प्राध्यापकहरुलाई रकम फिर्ता गर्न सूचना जारी गरेको थियो । त्यसयता ४४ जना प्राध्यापकले ११ करोड रुपैयाँ फिर्ता गरेको त्रिविले जनाएको छ । 

यसो त त्रिविले विज्ञ शिक्षक उत्पादन गर्न तलबसहितको अध्ययन बिदा दिने गर्छ । तर, तलब पनि खाने र बिदा सकिएपछि नफर्किनेहरु बढेपछि त्रिवि अध्ययन बिदाको दुरुपयोग गर्नेमाथि ‘एक्सन’मा उत्रिएको हो । अध्ययन बिदाको दुरुपयोग गरेर रकम फिर्ता नगर्नेलाई सम्पर्कमा आउन अनुरोध गरिएको छ । 

रकम फिर्ता नगर्नेलाई फेरि एकपटक सार्वजनिक सूचना जारी गरेर सम्पर्कमा आउन आग्रह गर्ने र त्यति गर्दा पनि सम्पर्कमा नआए कारवाही गर्ने त्रिविको तयारी छ ।