काठमाडौँ । क्यानडामा एक पाइलटले नक्कली लाइसेन्सकै भरमा १७ वर्षसम्म विमान उडाएको पाइएको छ । क्यानडाका पूर्व पाइलट जियोफ्री वालले १७ वर्षसम्म नक्कली लाइसेन्स देखाएर व्यवसायिक उडान गरेको पाइएको हो । 

वालमाथि नक्कली लाइसेन्सका भरमा विमान उडाएर हजारौँ यात्रुको सुरक्षालाई खतरामा पारेको आरोप छ । वाललाई जुन १ मा पक्राउ गरिएको थियो ।

उनीमाथि नक्कली कागजात प्रयोग गरेको, सार्वजनिक उपद्रव, ५ हजार डलरभन्दा बढीको ठगी र नक्कली प्रमाण चिन्ह राखेको लगायतका आरोप छन् । ट्रान्सपोर्ट क्यानडाको अनुसन्धानले कागजातमा कैफियत भेटेपछि वालको बदमासी बाहिर आएको हो । 

सन् १९९८ मा हवाई क्षेत्र प्रवेश गरेका वाल नक्कली प्रमाणपत्र देखाएर क्याप्टेन बनेको क्यानडा प्रहरीले जनाएको छ । उनीमाथि क्यानडा प्रहरीले थप अनुसन्धान गरिरहेको छ ।