काठमाडौँ । विशेष अदालतले राहदानी विभागका महानिर्देशक तीर्थराज अर्याललाई ४ दिन थुनामा राख्न अनुमति दिएको छ ।

विशेष अदालतका अध्यक्ष सुदर्शनदेव भट्ट र सदस्यहरु उमेश कोइराला र विदुर कोइरालाको इजलासले अर्याललाई ४ दिन थुनामा राखेर अनुसन्धान गर्न अनुमति दिएको हो ।

अर्याललाई राहदानी खरिद प्रकरणमा अनुसन्धानका लागि भन्दै अख्तियार दुरुपयोग अनुसन्धान आयोगले पक्राउ गरेको थियो । उनीसँगै अदालतले विभागका निर्देशक सुनील कुमार रेग्मीलाईसमेत ४ दिन थुनामा राख्न अनुमति दिएको छ ।

अख्तियारले २० दिन थुनामा राख्न अनुमति मागे पनि अदालतले ४ दिन मात्र थुनामा राख्न अनुमति दिएको हो । उनीहरुमाथि भ्रष्टाचारजन्य कसुरमा अनुसन्धान भइरहेको अख्तियारले जनाएको छ ।