काठमाडौँ । हप्तैपिच्छे केही न केही समस्या देखिइरहने इसेवाको झुर सेवाबाट ‘फिफा विश्वकप २०२६’ हेर्न खोज्ने ग्राहकहरु हैरानमा परेका छन् ।

‘डिगो’ मा विश्वकप हेर्नका लागि इसेवाबाट प्याकेज खरिद गर्न सकिने भए पनि इसेवाको झुर सेवाका कारण प्याकेज खरिद गरेको ४ दिनसम्म पनि खेल हेर्न नपाएको भन्दै ग्राहकहरुले गुनासो गरेका छन् । 

‘इसेवाबाट डिगो एपमार्फत विश्वकप हेर्न मोबाइल प्याकेज ५४९ रुपैयाँमा किनेको आज चार दिन भयो । खाताबाट पैसा लगिसक्यो तर हेर्न भने अहिलेसम्म पाएको छैन ।’, सामाजिक सञ्जालमा बिपी अनमोलले लेखेका छन्, ‘…मेरो पैसा फिर्ता गर्ने कि प्याकेज अपडेट गर्ने ?’ 

त्यस्तै, उनले समस्याबारे इसेवा र डिसहोमलाईसमेत खबर गरिसकेको बताएका छन् । तर, पैसा तिरिसक्दा पनि विश्वकप हेर्न नपाएको उनको गुनासो छ । 

यसो त इसेवाबाट प्याकेज खरिद गरेर विश्वकप हेर्न नपाएको गुनासो गर्ने बिपी अनमोलजस्ता थुप्रै छन् । कनेक्ट आईपीएस लगायत अन्य माध्यमबाट प्याकेज खरिद गर्दा तुरुन्तै खेल हेर्न पाइने भए पनि इसेवाबाट प्याकेज खरिद गर्दा भने ४-४ दिनसम्म ‘एक्सेस’ नपाउँदा पैसा पनि खेर गएको र खेल पनि हेर्न नपाएको भन्दै अहिले इसेवाको सेवाप्रति असन्तुष्टि जनाउने बढेका छन् ।