काठमाडौँ । नेपाल टेलिकमले बैंक तथा डिजिटल भुक्तानी सेवाको नाममा पठाइने भ्रामक एसएमएसबाट सचेत रहन अनुरोध गरेको छ । कनेक्ट आईपीएस लगायत विभिन्न बैंक तथा डिजिटल भुक्तानी सेवाको नाममा भ्रामक एसएमएस पठाउने गतिविधि भइरहेको पाइएकोले त्यसबाट सचेत रहन टेलिकमले आग्रह गरेको हो । 

नेपाल टेलिकमको एसएमएस सेवा दुरुपयोग गरी पठाइएका यस्ता एसएमएसमा खाता निलम्बन भएको, अस्थायी रुपमा बन्द भएको र अन्य समस्या देखिएको भन्दै सन्देश पठाइन्छ । 

यसरी ग्राहकलाई डर देखाएर सोही एसएमएसमार्फत पठाइएका शंकास्पद लिंक वा वेबसाइटमा प्रवेश गर्न प्रेरित गरिन्छ । जब ती लिंकमा क्लिक गरिन्छ वा वेबसाइटमा प्रवेश गरिन्छ, ह्याकरले प्रयोगकर्ताको फोनमा पहूँच पुर्याउँछ र बैंक तथा वालेटबाट पैसा चोरी गर्छ । 

त्यसैले नेपाल टेलिकमले ग्राहकलाई यस्ता एसएमएस, फोन तथा शंकास्पद लिंकप्रति सचेत रहन अनुरोध गरेको छ । कुनै पनि लिंक प्रयोग गर्नुअघि सम्बन्धित संस्थाको आधिकारिक वेबसाइट वा मोबाइल एपमार्फत जानकारी प्रमाणित गर्न तथा आफ्ना गोप्य विवरण सुरक्षित राख्न समेत टेलिकमले अनुरोध गरेको छ ।

त्यस्तै, अपरिचित वा शंकास्पद लिंकमा क्लिक नगर्न, ओटिपि, पासवर्ड, पि-आइएन, सिभिभि लगायतका गोप्य विवरण कसैसँग पनि सेयर नगर्न र बैंकिङ तथा डिजिटल भुक्तानी सम्बन्धी जानकारीका लागि सम्बन्धित संस्थाको आधिकारिक माध्यम मात्र प्रयोग गर्न समेत कम्पनीले सुझाव दिएको छ । शंकास्पद एसएमएस, फोन कल वा लिंक प्राप्त भएमा सम्बन्धित संस्थालाई तत्काल जानकारी गराउन समेत अनुरोध गरेको छ ।