काठमाडौँ । नेपाल राष्ट्र बैंकका पूर्व गभर्नर महाप्रसाद अधिकारीले आगामी आर्थिक वर्षको मौद्रिक नीति लचिलो हुने बताएका छन् । अर्थ समितिमा मौद्रिक नीतिका विषयमा भएको छलफलमा बोल्दै अधिकारीले यस्तो बताएका हुन् । 

अहिले मुलुकको समग्र आर्थिक आधारभुत अवस्था सबल रहेकोले मौद्रिक नीति कसिलो गर्नुपर्ने आवश्यकता नभएको उनको भनाई छ ।

उनले मूल्य स्थिरता र बाह्य क्षेत्रको अवस्था सन्तोषजनक रहेकाले पनि ब्याजदर तथा अन्य मौद्रिक उपकरण कसिलो बनाउन नपर्ने बताएका छन् । उनका अनुसार वर्तमान अवस्थामा राष्ट्र बैंकले बैंक दर, नीतिगत दर वा ब्याजदर करिडोरलाई थप कडा बनाउने आधार देखिँदैन ।

राष्ट्र बैंकभित्र उच्चस्तरीय प्राविधिक विश्लेषण र विस्तृत छलफलपछि मात्र मौद्रिक नीति निर्माण हुने उल्लेख गर्दै पूर्व गभर्नर अधिकारीले आगामी आर्थिक वर्षको मौद्रिक नीति लचिलो आउने बताएका छन् । 

‘हाल समग्र आर्थिक स्थिति एकदमै स्ट्रङ छ ।’, उनले भने, ‘यो स्थितिमा केन्द्रिय बैंकको म्याण्डेट भित्रको विषय मूल्य स्थिति इन्फ्लेसन र बाह्य क्षेत्रको स्थायित्वको विषयमा देश अलिकति सबल अवस्थामा रही रच्दा आउने मौद्रिक नीति स्वभावैले एकोमोडेटिभ रहन्छ, लचिलो रहन्छ, त्यसमा कसिलोपन कुनै राख्नुपर्ने आवश्यकता छैन ।’