काठमाडौँ । अर्थमन्त्री डा. स्वर्णिम वाग्लेले बुधबार (आज) नेपाल राष्ट्र बैंकका कार्यकारी निर्देशकहरुसँग भेट गर्दैछन् । मंगलबार वाणिज्य बैंकका प्रमुख कार्यकारी अधिकृत (सिइओ)हरु भेटेका अर्थमन्त्री वाग्लेले लगत्तै राष्ट्र बैंकका कार्यकारी निर्देशक भेट्न लागेका हुन् । 

राष्ट्र बैंकका कार्यकारी निर्देशकसँगको भेटमा अर्थतन्त्रको समस्या पहिचान र समाधानको उपायको खोजी सम्बन्धमा छलफल हुने बताइएको छ । 

छलफलमा देशको वित्तीय अवस्थाको गहिराइ बुझेका र मौद्रिक उपकरणको कार्यान्वयन गरिरहेका अधिकारीहरु सहभागी हुनेछन् । 

यसो त अर्थमन्त्री र राष्ट्र बैंकका गभर्नर तथा डेपुटी गभर्नरबीच नियमितजसो भेटघाट भइरहेको छ । राष्ट्र बैंकका गभर्नर र डेपुटी गभर्नरकै सल्लाह र समन्वयमा अर्थमन्त्रीले बैंकका सिइओ तथा राष्ट्र बैंकका कार्यकारी निर्देशकसँग छलफल गरिरहेका हुन् ।