काठमाडौँ । रसुवागढी हाइड्रोपावरको सुरुङमा खोजी तथा उद्धारका लागि गएको उद्धार टोली रित्तै फर्किएको छ । भोटेकोशीमा आएको बाढीपछि उद्धारका लागि भन्दै सुरुङभित्र गएको टोली रित्तै फर्किएको हो ।

सुरुङको अन्तिम भागमा मानिसहरु फसेको हुनसक्ने आशंका गरिएपछि नेपाली सेनाको नेतृत्वमा इन्जिनियर र ड्रोनसहितको टोली खोजीमा जुटेको थियो ।

तर, सुरुङको भित्री भाग अर्थात अन्तिम बिन्दुसम्मै पुगेर ड्रोनसमेत उडाएर खोजी गर्दा पनि सुरुङमा मानवीय उपस्थिति नभेटिएको नेपाली सेनाले जनाएको छ । 

नेपाली सेनाका अनुसार सुरुङभित्र कोही पनि मानिस नरहेको पुष्टि भएसँगै खोजी कार्य सम्पन्न गरी नेपाली सेनाको टोली त्यहाँबाट रसुवाको धुन्चे फर्किएको छ ।