काठमाडौँ । ग्लोबल आइएमई बैंकको नायब प्रमुख कार्यकारी अधिकृत (डिसिइओ)मा दीपचन्द्र रेग्मी नियुक्त भएका छन् । बैंकको मंगलबार बसेको सञ्चालक समितिको बैठकले रेग्मीलाई डिसिइओमा नियुक्त गर्ने निर्णय गरेको हो । 

बैंकको डिसिइओमा नियुक्त भएका रेग्मी यसअघि ग्लोबल आइएमई बैंकको सहायक प्रमुख कार्यकारी अधिकृतका रुपमा कार्यरत थिए । 

सन् २००७ मा स्ट्यान्डर्ड चार्टर्ड बैैंकमार्फत बैंकिङ करियर सुरु गरेका रेग्मी सन् २००९ देखि ग्लोबल आइएमई बैंकमा आबद्ध छन् । 

उनले बैंकको प्रमुख वित्तीय अधिकृत (सिएफओ), प्रमुख मानव संसाधन अधिकृत (सीएचआरओ), प्रमुख कर्जा अधिकृत (सीएलओ) तथा ट्रेड फाइनान्स प्रमुखको जिम्मेवारी सम्हालिसकेका छन् । उनी बैंकको सहायक कम्पनी ग्लोबल आइएमई क्यापिटल लिमिटेडको सञ्चालक समिति अध्यक्ष समेत रहिसकेका छन् । 

रेग्मीले थाइल्याण्डको एसियन इन्स्टिच्युट अफ टेक्नोलोजी (एआईटी) तथा डेनमार्कको कोपेनहेगन बिजनेस स्कुलबाट बिजनेस एडमिनिस्ट्रेसनमा स्नातकोत्तर (एमबीए) उपाधि हासिल गरेका छन् ।