काठमाडौँ । अमेरिकाको ओहायो राज्यस्थित एक ट्रक कारखानाबाट करिब १४ हजार कामदारले रोजगारी गुमाएका छन् । राष्ट्रपति डोनाल्ड ट्रम्पको चुनावी सभाभन्दा केही दिनअघि भएको कर्मचारी कटौतीले स्थानीय श्रमिक समुदायमा चिन्ता बढाएको छ ।

दक्षिणपश्चिमी ओहायोको पूर्व नाभिस्टार ट्रक कारखानामा बुधबार ठूलो संख्यामा कर्मचारी कटौती गरिएको हो । यसबाट डेटन क्षेत्रको रोजगारी र स्थानीय अर्थतन्त्रमा असर परेको बताइएको छ ।

रोजगारी गुमाउनेमध्येका ३० वर्षीय काइल बोसले परिवारको दैनिक खर्च धान्न कठिन भइरहेको बताएका छन् । दुई छोरीका पिता बोसको परिवारमा जनवरीमा अर्को बच्चा जन्मिने तयारीमा छ । बढ्दो खाद्यान्न तथा दैनिक उपभोग्य वस्तुको मूल्यले आर्थिक दबाब थपेको उनको भनाइ छ ।

यसअघि तीन पटक ट्रम्पलाई मतदान गरेका बोस पछिल्लो अवस्थाबाट निराश छन् । उनले आगामी नोभेम्बरको चुनावमा डेमोक्र्याटिक पार्टीका लागि मतदातासँग सम्पर्क गर्ने अभियानमा सहभागी हुने तयारी गरेका छन् ।

यसैबीच, ट्रम्पले शनिबार सोही क्षेत्रमा चुनावी सभा गर्ने कार्यक्रम छ । रोजगारीमा आएको गिरावट र महँगीका कारण श्रमिक वर्गको समर्थन आगामी चुनावमा महत्वपूर्ण बन्ने देखिएको छ । कुनै समय औद्योगिक गतिविधि र रोजगारीका लागि परिचित डेटन क्षेत्रमा अहिले आर्थिक अनिश्चितता बढ्दै गएको छ ।