- अर्थ सरोकार सम्बाददाता
काठमाडौं । कुमारी बैंक चालु आर्थिक वर्षको दोस्रो त्रैमासमा अर्बपति क्लबमा उक्लिएको छ । बैंकले चालु आर्थिक वर्षको दोस्रो त्रैमासमा नाफा ५१.४९% ले बढाएर १ अर्ब २१ करोड ६५ लाख ५८ हजार रुपैयाँ कमाएको वित्तीय विवरण सार्वजनिक गरेको हो । गत वर्षको सोहि अवधिमा बैंकले ८० करोड ३० लाख ११ हजार रुपैयाँ मात्रै नाफा कमाएको थियो ।
यस्तै बैंकले अधिकाशं सूचक सुधार आएको विवरण प्रकाशित गरको छ । बैंकका अनुसार खुद ब्याज आम्दानी ३७.०१% र सञ्चालन नाफा ५३.४७% ले बढेको छ । बैंकको वार्षिक प्रतिशेयर आम्दानी १७.५३ रुपैयाँ कायम भएको छ । बैंकले गत आवको नाफाबाट १०.८५ प्रतिशत बोनस शेयर वितरण गरेर चुक्ता पूँजी बढाएपनि नाफा उल्लेख्य बढ्दा समेत प्रतिशेयर आम्दानीमा सुधार नै देखिएको छ ।
जगेडा कोषमा ३ अर्ब ५० करोड रुपैयाँ सञ्चित रहँदा प्रतिशेयर नेटवर्थ १३०.८२ रुपैयाँ कायम भएको छ । यस्तै बैंकको आधारदर ७.९२ प्रतिशत र स्प्रेड रेट ३.५८ प्रतिशत छ । पुस मसान्तसम्ममा बैंकले १ खर्ब २२ अर्ब ७२ करोड ८८ लाख रुपैयाँ निक्षेप सङ्कलन गरी १ खर्ब १४ अर्ब ७३ करोड ८९ लाख रुपैयाँ कर्जा प्रवाह गरेको छ । बैंकको वितरण योग्य नाफा भने ३.१९% ले घटेर ६३ करोड ७५ लाख ५५ हजार रुपैयाँमा सीमित भएको छ ।
