">
- अर्थ सरोकार सम्बाददाता
काठमाडौं । कामना सेवा विकास बैंकको ४.६३ प्रतिशत लाभांश पारित भएको छ । पुस २९ गते बुधबार सम्पन्न बैंकको १४औं वार्षिक साधारणसभाले सञ्चालक समितिको उक्त प्रस्तावलाई पारित गरेको हो । यससँगै सेयरधनीले आर्थिक वर्ष २०७६/०७७ को मुनाफाबाट हाल कायम चुक्ता पुँजीको ४.४० प्रतिशत बोनस र ०.२३ प्रतिशत नगद(कर प्रयोजनको लागि) गरी ४.६३ प्रतिशत लाभांश पाउने छन् । २ अर्ब ५४ करोड रुपैयाँ रहेको संस्थाको चुक्ता पुँजी बोनस सेयर पछि २ अर्ब ६५ करोड रुपैयाँ नाघेको छ ।
बैंकले आ.व. २०७७/०७८ को लेखापरीक्षण गर्नको लागि बैंकको लेखापरीक्षण समितिद्वारा सिफारिस गरिएबमोजिम लेखापरीक्षक जि.पि. राजवाहक एण्ड कम्पनी चार्टड एकाउन्टेण्ट्सलाई पून नियुक्ति गरेको छ । यससँगै कोभिडको प्रभाव कम हुंदै गई आर्थिक गतिविधिहरु सामान्य अवस्थामा चलायमान हुँदै गएको हुनाले शाखा सञ्जाल, बैंकिङ्ग कारोबारको संख्यामा भएको उल्लेख्य वृद्धि, कर्जा तथा निक्षेपमा भएको वृद्धि, डिजिटाइजेसनमा गरेको दिगो लगानी, बजारमा बैंकले पारेको प्रभावका कारण आगामी वर्ष राम्रो प्रतिफल प्रदान गर्नेमा विश्वस्त रहेको कम्पनीले जानकारी गराएको छ ।
त्यस्तै, बैंकका प्रमुख कार्यकारी अधिकृत प्रविण बस्नेतले चालु आर्थिक वर्षको स्वीकृत बजेट तथा कार्यक्रमअनुसार निर्धारण गरिएका लक्ष्यहरु हासिल हुने गरी कार्यक्रम संचालन गरेको तथा यस बैंकको भावी रणनीति प्रस्तुत गर्दै यस बैंकलाई अत्याधिक प्रतिस्पर्धात्मक बजारमा एक अब्बल विकास बैंंकको रुपमा स्थापित गराउने कार्ययोजना सहित अगाडि बढेको बताए । बैंकको चौधौं वार्षिक साधारणसभा पुस २९ गते बुधबारका दिन काठमाडौं बूढानीलकण्ठ स्थित पार्क भिलेज रिसोर्टमा सम्पन्न भएको हाे ।
