">
काठमाडौँ । नेपाल राष्ट्र बैंकका गभर्नर महाप्रसाद अधिकारी नेकपा एमालेको अर्थ तथा योजना विभागमा बसेको भन्ने खबरले यति बेला बजार तताएको छ । महाप्रसाद अधिकारीले सो ‘एम अधिकारी’ आफु नभएको स्पष्टीकरण दिए पनि यो विषय सडकदेखि सदनसम्म पुगेको छ र धेरैलाई ‘एम अधिकारी’ भनेकै महाप्रसाद हुन् भन्ने छ । पछि नेकपा एमालेको सचिवालयले ‘एम अधिकारी’ भनेको मनोज अधिकारी हुन् र उनी बिराटनगरका सिए हुन् भन्ने जानकारी मिडियालाई दिएपछि बिराटनगरका चार्टड एकाउन्टेन्ट मनोज अधिकारी आफैं अलमल्लमा परे । त्यसपछि मिडियामा उनी सम्पर्कविहीन भए भन्ने कुरा पनि आयो । शुक्रबार उनी अर्थ सरोकारको सम्पर्कमा आएका छन् । र हामीले उनीसँग केहि कुराकानी गरेका छौँ ।
१. खासमा तपाईंलाई एम अधिकारी बनाउन खोजियो भन्ने कुरा के हो ?
म पार्टीमा संलग्न कुरा सत्य हो । र नेकपा एमालेले मलाई महत्वपूर्ण जिम्मेवारी दिने कुरा पनि भएको हो । तर कुन जिम्मा दिईएको छ भन्ने मलाई थाहा थिएन । पछिल्लो समय असार मसान्तको समय भएकाले म सामाजिक संजालभन्दा बाहिर थिएँ । कामको प्रेसरले फोनसमेत अफ थियो । तर त्यसैलाई अतिरन्जित बनाएर समाचारहरु आएका रहेछन्, जुन गलत भयो । म सम्पर्कविहीन भएँ वा मलाई एम अधिकारी बनाउन खोजेपछि म भागें भन्ने कुरा सरासर गलत हो ।
२. तपाईं एम अधिकारीचाहिं हो कि होइन ?
म मनोज अधिकारी हुँ । त्यसैले कसैले ‘एम अधिकारी’ भन्दा अन्यथा भएन । तर एमालेले बनाएको विभागमा भएको एम अधिकारी म हुँ कि होइन भन्ने मलाई पनि थाहा छैन ।
३. तपाईंलाई कुनै औपचारिक जानकारी आएको छैन ?
अहँ छैन । महत्वपूर्ण जिम्मा दिइनेछ भनेर पार्टीले भनेको हो । तर मलाई कुन समितिमा राखिएको छ भन्ने मलाई कुनै पनि जानकारी छैन । अर्थ तथा योजना विभागमा भएको एम अधिकारी म नै हुँ भन्ने कुरा मलाई पनि यकिन छैन ।
४. यति धेरै कुरा उठिरहेका बेला किन सम्पर्कविहीन हुनुभयो त ?
म सम्पर्कविहीन भएको छैन । असार मसान्तको प्रेसरले म काममा व्यस्त थिएँ र म सामाजिक संजालभन्दा बाहिर थिएँ । सिए फर्मको मान्छेलाई असार मसान्त कसरी लाग्छ तपाईंले पनि बुझ्नुभएकै होला । भएको यति हो ।
५. तपाईं एमालेचाहिं हो ?
म एमालेको सक्रिय सदस्य हुँ। त्यसमा दुईमत छैन । हाल उक्त समितिको नाम गभर्नर महाप्रसाद अधिकारीज्यू सँग मिल्दो जुल्दो भएकोले उक्त समितिमा म नै मनोनित भएको हो वा होइन भनी हालसम्म यकिन छैन । मनोनित भएको भए पनि मेरो व्यक्तिगत कारणले सो पदमा म बस्न नसक्ने जानकारी गराउँछु ।
