काठमाडौँ । एक युवाले आफ्ना साथीहरुलाई आफुले सेयर बजारका बारेमा बुझेको र सेयर बजारमै लगानी गरेर करोडौं कमाउने सपना बाँड्छन् । सो सपना बाँडेर उनीहरुले सेयर बजारमा लगानी गर्छन् । तर राष्ट्र बैंकको नीतिका कारण बजार बियरिस लाग्छ र उनीहरु डुब्छन् । डुब्नेमात्र होइन उनीहरु भिखारी बन्छन् । पैसा हुँदा आफ्नी भएकी प्रेमिकाले पैसा भिख दिएर जान्छिन् ।
हुन त यो सत्य घटनाको भिडियो अवतार होइन, बरु दिनेश गौतमले गाएको गीत ‘पैसाले घुमाउँछ फनफनी’ शीर्षकको गीतको भिडियो कथा हो । र पनि यो भिडियोभित्र सेयर बजारका धेरै लगानीकर्ताहरुको थोरबहुत कथा लुकेको छ ।
७ महिनापछि यसरी भयो गीत भाइरल
धेरैलाई यो गीतका बारेमा थाहा नै थिएन । तर सेयर लगानीकर्ताका केहि ग्रुपमा यो गीतको भिडियो सेयर भएपछि अहिले यो गीत सेयर बजारमै भाइरल भएको छ । यो गीत भाइरल हुँदै गर्दा बजारले चरम बियरिस भोगेको यथार्थ पनि छ । अहिले बजार बढे पनि यो गीत निकै सान्धर्भिक बनेको छ धेरैलाई ।
हुन त यो गीत ७ महिना अघि नै आएको थियो, तर त्यसपछि पनि बजार धेरै घट्यो । सेयरको कथा बनेको भिडियो भए पनि सेयर बजारका लगानीकर्ताहरुलाई यो गीतका बारेमा त्यति थाहा थिएन । जव थाहा भयो, अहिले यो गीतको मज्जा लिईरहेका छन् सेयर लगानीकर्ताहरु ।
भिडियोमा सेयर लगानीकर्ताहरुलाई राष्ट्र बैंकको नीतिले डुबाएको तथ्य प्रस्तुत गरिएको छ । जुन केहि हदसम्म सत्य पनि हो । भिडियोले रमाइलो पारामा सेयरमा लगानी गर्नेहरुलाई बुझेर मात्र लगानी गर्नु भन्ने सन्देश दिएको छ ।
गीत गाउने गायक छैनन् दोश्रो बजारमा
यसो त यो गीत गाउने दिनेश गौतम पैसाको गीत गाउने गायकका रुपमा चिनिन्छन् । उनको ‘पैसा कसले बनायो ?’, ‘इमान बेचिदिन्छ मान्छे’, लगायतका पैसा सम्बन्धि गीत चर्चित छन् । यसो त यो समाचार तयार गर्दासम्म ‘पैसाले घुमाउँछ फनफनी’ शीर्षकको यहि गीत पनि ११ लाखले हेरिसकेका छन्, जुन चर्चित गीतको अर्को उदाहरण पनि हो । तर स्वयम् गौतम भने आफ्नो सेयरको दोश्रो बजारमा लगानी नरहेको बताउँछन् । ‘डिम्याट खाता खोलेको छु, आईपीओ भरेको छु, तर परेको छैन, दोश्रो बजार सिक्दैछु, लागिसकेको छैन’ उनले अर्थ सरोकारसँगको कुराकानीमा भनेका छन् ।
