">
काठमाडौं । नतिजा आफैँमा संवेदनशिल विषय हो । नतिजाले विद्यार्थी पास वा फेल मात्रै देखाउँदैन, बरु विद्यार्थीको भविष्य निर्धारण गर्छ । तर, शिक्षा जस्तो संवेदनशील क्षेत्रमा पनि त्रिभुवन विश्वविद्यालयले भद्धा मजाक गरेको छ ।
पुस २ गते (सोमबार) त्रिभुवन विश्वविद्यालयले मानविकी तथा सामाजिकशास्त्र संकाय तर्फ ३ वर्षे स्नातक तह तेस्रो वर्षको नतिजा सार्वजनिक गर्यो । तर, त्रिविले सार्वजनिक गरेको सो नतिजामा अधिकांश रिजल्टमा त्रुटी भेटिएको छ । त्रिविले सार्वजनिक गरेको रिजल्टमा आफुले लिँदै नलिएको विषयमा समेत अनुपस्थित देखाएको पाइएको हो ।
‘रिजल्ट आयो भन्ने समाचारले खुसी भएको मन एकैछिनमा निराशामा बदलियो’, एक विद्यार्थीले अर्थ सरोकारसँग भने, ‘रिजल्ट त आयो तर दिँदै नदिएको विषयमा अनुपस्थित देखाएर टियूले रिजल्ट नै बिगारिदियो ।’
टियूले रिजल्ट बिगारेको भन्दै अर्थ सरोकारको सम्पर्कमा आएक ती विद्यार्थीले मानविकी संकायतर्फको ‘पब्लिक रिलेसन, विज्ञापन र मिडिया इस्यु’ (३१४)को पूरक परिक्षा दिएका थिए । तर, टियूले सार्वजनिक गरेको नतिजामा उनलाई सामाजिकशास्त्र विषयमा अनुपस्थित देखाइएको छ । यतिसम्म कि उनले सो विषय लिएका समेत थिएनन् ।
‘रेगुलर परिक्षामा पब्लिक रिलेसन लागेको थियो, अरु सबैमा पास भएको थिएँ’, उनले भने, ‘अहिले लिँदै नलिएको विषयमा अनुपस्थित देखाएको छ । फर्म मै समावेश नगरेको विषयमा मलाई कसरी अब्सेन्ट देखायो आफै अचम्ममा छु ।’
यसो त टियूले रिजल्ट सार्वजनिक गर्नुपूर्व नै सूचना जारी गर्दै रिजल्टमा त्रुटी हुनसक्ने जनाएको छ । ‘परिक्षाफल सकेसम्म शुद्ध होस् भन्ने उद्धेश्य राखी प्रकाशित गरिएको छ तापनि छपाई तथा अन्य कुनै कारणबाट अशुद्ध देखिएमा यस कार्यालयको अभिलेखबाट सच्याइने व्यहोरा अवगत गराईन्छ ।’- टियूले जारी गरेको सूचनामा उल्लेख गरिएको छ ।
