">
- अर्थ सरोकार सम्बाददाता
मुगु । मुगुको पर्यटकीय स्थलहरुमा अहिले आन्तरिक पर्यटकको चहलपहल बढेको छ । कोरोना कारणले सुनसान रहेको रारामा दसैँ–तिहारको बीचमा रारा घुम्न आउने आन्तरिक पर्यटकको संख्या वृद्धि भएको रारा राष्ट्रिय निकुञ्ज कार्यालयले जनाएको छ ।
कोरोना महामारीका कारणले करिब सात महिना सुनसान रहेको रारामा अहिले दैनिक एक सय ५० जनासम्म आन्तरिक पर्यटकहरू सडक र हवाईमार्गबाट आउने गरेको निकुञ्जका निमित्त संरक्षण अधिकृत पदम बुढाले बताए । रारा राष्ट्रिय निकुञ्जका अनुसार यस वर्षको असोज र कात्तिक महिनामा रारामा झन्डै तीन हजार आन्तरिक पर्यटक भित्रिए छन् ।
बिदा रारामा मनाउनेको संख्या वृद्धि भएका कारणले कर्णाली राजमार्गमा रहेका होटेल तथा अन्य व्यावसायिक चहलपहल पनि निकै बढेको नाग्ममा व्यवसायी नरेन्द्र रोकायाले बताए ।
