काठमाडौं । ललितपुर महानगरपालिकाले १० वटा सहकारी संस्था खारेज गरेको छ । महानगरपालिकाले सहकारी ऐन, २०७५ अनुसार विगत पाँच वर्षभन्दा बढी अवधिदेखि लेखा परिक्षण तथा साधारणसभा नगर्ने र विवरण नबुझाउने १० सहकारी संस्थाको इजाजत खारेज गरेको हो ।

२०७९ असार १५ मा एक सूचना जारी गर्दै सम्पर्कमा आउन आग्रह गरे पनि सहकारीबाट कोही पनि महानगरको सम्पर्कमा नआएपछि ती सहकारी संस्थाको इजाजत खारेज गर्ने निर्णय गरेको महानगरपालिकाले जनाएको छ ।

खारेज भएका १० वटा सहकारी संस्थाहरुले तिर्नु वा बुझाउनुपर्ने कुनै दायित्व भए सम्बन्धित व्यक्तिले प्रमाणसहित सहकारीका सञ्चालक समितिका पदाधिकारीसँग सम्पर्क गरी फरफारक गर्न पनि महानगरले आग्रह गरेको छ । ‘अब उप्रान्त उक्त संस्थाहरुको नामबाट कुनै पनि कारोबार नगर्न÷नगराउनु हुनसमेत जानकारी गराइन्छ ।’- महानगरले जारी गरेको सूचनामा उल्लेख गरिएको छ ।