घटबढ भनेको सेयर बजारको नियति नै हो । बढ्दो बजार होस् वा घट्दो बजारमा प्रवेश गर्नेहरु र निस्कनेहरु सधैं सक्रिय भईनै रहन्छन् । बढ्दो बजार उल्लासमय हुन्छ । सबैतिर सेयर बजारकै चर्चा, परिचर्चा हुन्छ भने घट्दो बजार निराश र सुनसान जस्तै हुन्छ । यो अवस्थामा सेयर भनेकै डुबाउने कुरा हो भन्ने भान आम जनमानसमा पर्न जान्छ । सेयर बजारबाट घाटा खाएर निस्केकाहरु त झन् सेयरको ”स” पनि सुन्न रुचाउँदैनन् । क्लब हाउस, भाइबर लगायत सामाजिक सञ्जालका विभिन्न ग्रुपहरु पनि निष्क्रियजस्तै हुन्छन् । यस्तो अवस्थामा बजारबाट निस्किएकाहरु खुशी भए पनि बजारमै रहेका र उच्च बिन्दुमा प्रवेश गरेकाहरु भने तनावमा रहेका हुन्छन् । कुर्दा-कुर्दा बजार धेरै तल आईसक्दा बेच्न पनि सकिँदैन थप खरिदको लागि रकम पनि जुटाउन सकिँदैन । घट्दो बजारमा बैंक तथा वित्तीय संस्थाहरुले सेयर कर्जा निरुत्साहित गरिरहेका हुन्छन् भने परिवार, आफन्त, साथीभाईबाट पनि सहयोग प्राप्तिको अपेक्षा गर्न सकिँदैन। यस्तो अवस्थामा निम्न तरिकाबाट तनाव व्यवस्थापन गर्न सकिन्छ।

सेयर बजारमा लगानी गर्नेले ऋणलाई भन्दा स्व-पुँजीलाई प्राथमिकतामा राख्नुपर्दछ । घट्दो बजारमा यदि कसैले ऋण लिएर लगानी गरेको भए सबैभन्दा पहिला ऋणलाई घटाउने, सकिन्छ भने हटाउने तर्फ ध्यान दिनु जरुरी छ। घट्दो बजारमा ऋण लिएर लगानी गर्दा यता बजारमा गरिएको लगानी पनि घट्दै जाने उता ऋणको ब्याजका साथै आउने मार्जिन कलको चाप धान्न मुश्किल हुने हुँदा ऋणको व्यवस्थापन अत्यन्त जरुरी छ ।