काठमाडौं । नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले सहकारी क्षेत्र सहभागितामूलक लोकतन्त्रको एउटा रुप भएको बताएका छन् । शुक्रबार समाजवादी सहकारी संगठन नेपालद्धारा आयोजित कार्यक्रममा नेता नेपालले यस्तो बताएका हुन् ।
कार्यक्रममा बोल्दै नेता नेपालले सहकारीले आममानिसको हितमा काम गर्नुपर्ने बताएका छन् । मिश्रित अर्थतन्त्रका मान्यताअनुरूप सहकारी निजी र राज्य सम्मिलित तीनखम्बे अर्थतन्त्रलाई संविधानले पनि अगाडि सारेको नेपालको भनाई रहेको छ ।
त्यस्तै, समाजमा छरिएका स–साना पुँजीलाई एकीकृत गरी ठूलो लगानीका लागि सहकारीले वातावरण निर्माण गर्नुपर्नेमा नेपालले जोड दिएका छन् ।
योसँगै अध्यक्ष नेपालले अहिले मिटरब्याज पीडितहरूको अवस्था विकराल भएको भन्दै चिन्तासमेत व्यक्त गरेका छन् । पूर्वप्रधानमन्त्रीसमेत रहेका अध्यक्ष नेपालले सरकारले सार्वजनिक गरेको न्यूनतम साझा कार्यक्रममा समेत यसलाई सम्बोधन गरिएको बताएका छन् ।
