काठमाडौं । बागमती प्रदेश सरकारले घटाएको सार्वजनिक गाडी भाडा लागू नभएको पाइएको छ । प्रदेश सरकारले ११ जेठमा राजपत्रमै सूचना प्रकाशन गर्दै विभिन्न रुटको भाडा दर घटाए पनि कार्यान्वयन भने नभएको पाइएको हो ।
छोटो तथा लामो दुरीको सार्वजनिक सवारी साधनको भाडा घटे पनि हाल नागरिकहरु पुरानै भाडा तिरेर यात्रा गर्न बाध्य छन् । कतिपय रुटमा त झन् पुरानो मात्र होइन भाडादरमा उल्टै वृद्धि गरिएको पाइएको छ । यसो त काठमाडौं उपत्यकामा चल्ने स्थानीय सवारीसाधनले पनि प्रदेश सरकारले घटाएको भाडा कार्यान्वयन गरेका छैनन् । अझ उपत्यकाको भित्रि रुटमा चल्ने सवारीसाधनले भनै आफूखुसी भाडा असुली गर्ने गरेको यात्रुहरुको गुनासो छ ।
नेपाल यातायात व्यवसायी राष्ट्रिय महासंघका अध्यक्ष विजय स्वाँरले काठमाडौं उपत्यकामा चल्ने सवारीमा न्यूनतम भाडा १९ रुपैयाँ कायम भएको बताएका छन् । तर, सवारीसाधनहरुले भने आफूखुसी भाडा असुली गरिरहेको पाइएको छ । यसरी भाडादरभन्दा बढी वा मनपरी असुली गर्नु यातायातभित्रको विकृति भएको बताउँदै स्वाँरले अनुगमन गरी कार्वाही गर्ने बताएका छन् । यता काठमाडौं उपत्यका ट्राफिक प्रहरी कार्यालयले पनि प्रदेश मन्त्रालयबाट भाडा बढेको विषयमा आधिकारिक जानकारी नआएको जनाएको छ ।
यसरी प्रदेश सरकारले भाडा दर घटाए पनि कार्यान्वयनमा भने समस्या देखिँदा यात्रुहरु दुविधामा परेका छन् ।
