काठमाडौं । अनलाइन ठगिको आरोपमा प्रहरीले पाँच जनालाई पक्राउ गरेको छ । अरुको फेसबुक आईडी ह्याक गरी रकम ठगी गरेको भन्ने आरोपमा बिहीबार प्रहरीले पाँच जनालाई पक्राउ गरेको हो ।

पक्राउ पर्नेहरुमा बारा जिल्ला जितपुर सिमरा उप–महानगरपालिका वडा नं. १७ रामनगर घर भई हाल काठमाडौं बस्ने सिमान्त लामा, रोहन तामाङ, अमन्त लामा, अनुप श्रेष्ठ र कास्की घर भई हाल काठमाडांै नयाँबसपार्क बस्ने सुब्बु भन्ने शुभेक्षा गुरुङ रहेका छन् ।

उनिहरुले फेसबुक ह्याक गरी नजिकका मान्छेसँग विभिन्न बाहानामा ओटिपी र सापटी रकम मागी १४ लाख ५८ हजार रुपैयाँ ठगी गरेको प्रारम्भिक अनुसन्धानबाट खुलेको प्रहरीले जनाएको छ ।

प्रहरीका अनुसार काठमाडौंको नयाँ बसपार्कबाट उनीहरुलाई पक्राउ गरिएको हो । उनीहरुको साथबाट ह्याकिङमा प्रयोग भएका मोबाइल, ल्याप्टप र कपडा बरामद गरिएको छ ।

उनीहरुलाई थप अनुसन्धान तथा कार्वाहीका लागि जिल्ला प्रहरी परिसर टेकु पठाईएको प्रहरीले जनाएको छ ।