काठमाडौँ । भूकम्पबाट घरबारविहीन भएकाहरुका लागि चौधरी ग्रुपले ‘ट्रान्जिसनल’ घर बनाउने भएको छ । गत शुक्रबार राती जाजरकोट केन्द्रबिन्दु बनाएर गएको विनाशकारी भूकम्पका कारण घरबारविहीन भएका परिवारका लागि चौधरी ग्रुपले ‘ट्रान्जिसनल’ घर बनाइदिने भएको हो ।

पहिलो चरणमा चौधरी ग्रुपले रुकुमको चौरजहारी नगरपालिकाका भूकम्प पीडितका लागि ‘ट्रान्जिसनल’ घर बनाइदिने भएको छ । जसका लागि चौधरी फाउन्डेसनले नगरपालिकासँग सहमतिसमेत गरेको छ ।

रुकुमको चौरजहारी नगरपालिकामा भूकम्पका कारण घर भत्किएका ५० परिवारको लागि ‘ट्रान्जिसनल’ घर बनाइने चौधरी ग्रुपका महाप्रबन्धक मधुसुदन पौड्यालले जानकारी दिएका छन् । ‘ट्रान्जिसनल’ घर निर्माणको पहिलो चरणको काम सकिएलगत्तै सहयोगको थप कार्य गर्ने पनि चौधरी ग्रुपले जनाएको छ ।

यसअघि चौधरी फाउन्डेसनले २०७२ सालको भूकम्पमा घरबारविहीन भएकाहरुको लागि ३ हजार ‘ट्रान्जिसनल’ घर बनाइदिएको थियो ।