काठमाडौं। एशियन लाइफ इन्स्योरेन्सको साधारणसभा फागुन १८ गते हुने भएको छ । सभा होटल क्लासिक सिमरा, बारामा बिहान साढे ११ बजे सुरु हुने जनाईएको छ।

सभामा इन्स्योरेन्सले गत आर्थिक वर्षको मुनाफाबाट सेयरधनीलाई ७.७५ प्रतिशत बोनस सेयर र कर प्रयोजनका लागि ०.४०७ प्रतिशत नगद वितरण गर्ने प्रस्ताव पेश गर्ने भएको छ । साथै, सभामा आर्थिक वर्ष २०७९/८० को वार्षिक प्रतिवेदन, नाफा-नोक्सान तथा नगद प्रवाह विषयमा पनि छलफल हुनेछ ।

आर्थिक वर्ष २०८०/८१ का लागि लेखापरीक्षक नियुक्ति गर्ने र निजको पारिश्रमिक निर्धारण गर्ने एजेण्डा पनि रहेको इन्स्योरेन्सले जनाएको छ । त्यसैगरी, बोनस सेयर वितरणपश्चात कायम हुने पुँजीमा ४२ प्रतिशत हकप्रद सेयर निष्कासन गर्ने सम्बन्धमा पनि विशेष प्रस्ताव पेश हुनेछ ।

सभा प्रयोजनका लागि कम्पनीले फागुन ८ गते मंगलबार बुक क्लोज गरेको छ । तसर्थ, फागुन ८ गतेसम्म कायम सेयरधनीले मात्रै सभामा भाग लिन र लाभांश हात पार्न सक्नेछन्।