काठमाडौँ । तीन लाख रुपैयाँमा तीन युवती बेच्ने दुई युवक पक्राउ परेका छन् । आकर्षक तलबमा विदेश पठाइदिने भन्दै भारत लगेर एक लाख रुपैयाँका दरले तीन युवती बेच्ने दुई युवक पक्राउ परेका हुन् ।

पक्राउ पर्नेमा सिन्धुपाल्चोकको इन्द्रावती गाउँपालिका–४ का ३८ वर्षीय बच्चु विक सुनार र सोही ठाउँका ४७ वर्षीय दावा लामा रहेका छन् ।

उनीहरुलाई प्रहरीको केन्द्रीय अनुसन्धान ब्युरो (सीआईबी)को टोलीले पक्राउ गरेको हो । सीआईबीका अनुसार बच्चलाई चैत ५ गते कपन र दावालाई १६ गते टिकाथलीबाट पक्राउ गरिएको हो ।

पक्राउ परेका बच्च र लामाले २०६४ माघ ५ गते तीन जना युवतीहरुलाई वीरगञ्ज हुँदै भारतको शहिदनगर लगेर एक लाख रुपैयाँका दरले बेचेको पाइएको सीआईबीले जनाएको छ । उनीहरुविरुद्ध मानव बेचबिखन तथा ओसारपोसारको मुद्दामा २०७८ फागुन १ गते बच्चुलाई २० वर्ष कैद र ३ लाख जरिवाना र दावालाई ६० वर्ष कैद र ६ लाख रुपैयाँ जरिवानाको फैसला भएको थियो ।