काठमाडौँ । नागरिक लगानी कोष र चिरायु हस्पिटलबीच सेवा प्रदान गर्ने सम्झौता भएको छ । नागरिक लगानी कोष र चिरायु नेशनल हस्पिटल एण्ड मेडिकल इन्स्टिच्युट प्रालिबीच कोषका सहभागी, सेयरधनी, कर्मचारी र उनीहरूका आश्रित परिवारलाई चिरायु हस्पिटलमा औषधोपचारमा छुट दिने सम्झौता भएको हो ।
सो सम्झौता अनुसार कोष सञ्चालक समितिका सदस्य, कोष कर्मचारी, र कर्मचारीका आश्रित परिवारले बेडमा १०, डायग्नोस्टिकमा १०, औषधि खरिदमा ५ प्रतिशत छुट पाउने छन् । साथै, उपत्यका भित्र निःशुल्क एम्बुलेन्स सेवा समेत उपलब्ध गराइने छ ।
त्यस्तै, सहभागी र सहभागीका परिवारलाई बेडमा १०, डायग्नोस्टिकमा १०, औषधि खरिदमा ५ र एम्बुलेन्स सेवामा २५ प्रतिशत छुट दिइने पनि सम्झौतामा उल्लेख गरिएको छ ।
उक्त सम्झौतामा कोषको निमित्त कार्यकारी निर्देशक शोभा श्रेष्ठ र हस्पिटलका तर्फबाट अपरेसन डाइरेक्टर सिएन वैद्यले हस्ताक्षर गरेका हुन् ।
