काठमाडौँ । नेपाल राष्ट्र बैंकले बैंक तथा वित्तीय संस्थाको मुद्दती निक्षेपमा लगानी गर्ने भएको छ । राष्ट्र बैंकले वाणिज्य बैंक, विकास बैंक र राष्ट्रिय स्तरका वित्त कम्पनीहरुको मुद्दती निक्षेपमा लगानी गर्ने भएको हो ।
राष्ट्र बैंकले बैंक तथा वित्तीय संस्थाहरुमा ३ सय ६६ दिनको मुद्दती निक्षेपमा लगानी गर्न लागेको छ । उक्त निक्षेपको अवधि २०८१ असार २ गतेदेखि सुरु हुनेछ भने २०८२ असार २ गते समाप्त हुनेछ ।
राष्ट्र बैंकका अनुसार मुद्दती निक्षेपमा लगानी हुने कुल १३ करोड २६ लाख रुपैयाँमध्ये ‘क’ वर्गका वाणिज्य बैंकमा १० करोड ६२ लाख, ‘ख’ वर्गका विकास बैंकहरुमा १ करोड ९८ लाख र ‘ग’ वर्गका वित्त कम्पनीहरुमा ६६ लाख रुपैयाँ लगानी गरिनेछ । उक्त लगानीका लागि राष्ट्र बैंकले बैंक तथा वित्तीय संस्थाहरूको बोलपत्रसमेत आह्वान गरेको छ ।
बोलपत्र पेश गर्दा बैंक तथा वित्तीय संस्थाहरुले आफूले लिन चाहेको रकम, उक्त रकममा दिन सक्ने ब्याजदरसमेत उल्लेख गर्नुपर्नेछ । उक्त बोलपत्र जेठ १६ गतेभित्र पेश गर्नुपर्ने राष्ट्र बैंकले जनाएको छ ।
त्यस्तै, राष्ट्र बैंकबाट मुद्दती निक्षेप लिनका लागि बैंक तथा वित्तीय संस्थाले न्यूनतम पूँजीकोष कायम गरेको तथा निष्क्रिय कर्जा कुल कर्जा सापटको ५ प्रतिशतभन्दा कम भएको हुनुपर्ने पनि राष्ट्र बैंकले जनाएको छ । यसका साथै खुद तरल सम्पत्ति स्वदेशी निक्षेपको कम्तीमा २० प्रतिशत वा सोभन्दा बढी रहेको, कर्जा स्वदेशी निक्षेप र प्राथमिक पूँजी अनुपात बैंकले समय समयमा निर्धारण गरेको सीमाभित्र रहेको हुनुपर्नेछ ।
