काठमाडौँ । नेपाल बीमा प्राधिकरणले एकाघर बीमाको नयाँ नियम सच्याएको छ । प्राधिकरणले एकाघर बीमाको नयाँ नियम लागू गर्दै एकाघर परिवारका सदस्यमाथि बीमा गर्न रोक लगाएको प्रावधान खारेज गरेको हो । 

प्राधिकरणले सञ्चालक समितिको बैठकबाट संस्थागत सुशासन निर्देशनमा पहिलो संशोधन गर्दै अभिकर्ताले आफू अभिकर्ता भएर एकाघर परिवारको सदस्यको बीमा गर्न नपाउने नियम खारेज गरेको जनाएको छ । योसँगै अब बीमा अभिकर्ताले आफू अभिकर्ता भएर एकाघर परिवारका सदस्यको जीवन वा कुनै पनि सम्पत्ति वा दायित्वको बीमा गर्न पाउने भएका छन् । 

यसो त यसअघि प्राधिकरणले संस्थाको सुशासन सम्बन्धी निर्देशिका २०८० जारी गर्दै बीमा अभिकर्ताले एकाघर परिवारको बीमा गर्न नपाउने व्यवस्था गरेको थियो । 

तर, प्राधिकरणको उक्त व्यवस्थाले जीवन बीमाको विस्तारमा अवरोध सृजना गरेको भन्दै पेशागत बीमा अभिकर्ताहरुले उक्त व्यवस्थाको विरोध गरेका थिए । उनीहरुले बीमा प्राधिकरणले सरेकारवालासँग छलफल तथा परामर्श नै नगरी उक्त व्यवस्था ल्याएको भन्दै एकाघर बीमाको नियम खारेजीको माग गर्दै आएका थिए । अन्ततः प्राधिकरणले उक्त व्यवस्था खारेज गरेको छ ।