काठमाडौँ । सरकारले चालु आर्थिक वर्षको तीन महिनामा झण्डै साढे एक खर्ब सार्वजनिक ऋण लिएको छ । सरकारले साउन, भदौ र असोज महिनामा मात्रै १ खर्ब ३६ अर्ब ३१ करोड रुपैयाँ सार्वजनिक ऋण लिएको हो ।
जसमध्ये १ खर्ब १५ अर्ब रुपैयाँ आन्तरिक ऋण र २१ अर्ब ३१ करोड रुपैयाँ बाह्य ऋण भएको अर्थ मन्त्रालय अन्तर्गतको सार्वजनिक ऋण व्यवस्थापन कार्यालयले जनाएको छ ।
योसँगै सरकारले तिर्न बाँकी सार्वजनिक ऋण २५ खर्ब २३ अर्ब ३ करोड रुपैयाँ पुगेको छ । कार्यालयका अनुसार यस अवधिमा सरकारले ६९ अर्ब ३ करोड रुपैयाँ ऋण तिरेकोसमेत छ ।
हाल नेपाल सरकारको नाममा आन्तरिक ऋणको हिस्सा १२ खर्ब ३६ अर्ब ३० करोड र बाह्य ऋणको हिस्सा १२ खर्ब ८६ अर्ब ७३ करोड रुपैयाँ रहेको छ ।
