काठमाडौँ । अमेरिकाको अदालतले जन्मेकै आधारमा नागरिकता पाउने व्यवस्था हटाउने अमेरिकी राष्ट्रपति डोनाल्ड ट्रम्पको आदेश रोकेको छ । अदालतले ट्रम्पको उक्त कार्यकारी आदेशलाई असंवैधानिक भन्दै तत्कालका लागि उक्त आदेश रोकेको हो ।
ट्रम्पको उक्त आदेशविरुद्ध परेको मुद्दाको सुनुवाइ गर्दै संघीय जिल्ला अदालतका न्यायाधीश जोन सी कोफनरले ट्रम्पको उक्त आदेश कार्यान्वयनमा अस्थायी रुपमा रोक लगाएका हुन् ।
अदालतले ट्रम्पको उक्त आदेशलाई १४ दिनका लागि रोक लगाएको अन्तराष्ट्रिय सञ्चारमाध्यमहरुले जनाएका छन् । यद्यपि १४ दिनपछि उक्त आदेशलाई नवीकरणसमेत गर्न सकिनेछ ।
ट्रम्पले राष्ट्रपतिको सपथ ग्रहण गर्दै अमेरिकामा जन्मेकै आधारमा नागरिक पाउने व्यवस्था हटाउने आदेशमा हस्ताक्षर गरेका थिए ।
