काठमाडौँ । काठमाडौँबाट स्रोत नखुलेको ३९ लाख बढी नगदसहित एक जना पक्राउ परेका छन् । काठमाडौँ महानगरपालिका-२४ इन्द्रचोकबाट स्रोत नखुलेको ३९ लाख ७८ हजार रुपैयाँसहित ४८ वर्षीय माधव श्रेष्ठ पक्राउ परेका हुन् । 

चितवनको भरतपुर महानगरपालिका-१५ घर भई हाल काठमाडौँ टोखा बस्दै आएका श्रेष्ठलाई उपत्यका प्रहरी कार्यालय रानीपोखरीको इन्टिलिजेन्स शाखाबाट खटिएको टोलीले पक्राउ गरेको हो । 

पक्राउ परेका श्रेष्ठको साथबाट बरामद गरिएको रकमको स्रोत नखुलेको प्रहरीले जनाएको छ । उक्त रकम हुन्डी कारोबारका लागि प्रयोग भएको हुनसक्ने प्रहरीले आशंका गरेको छ । 

हाल उनीमाथि थप अनुसन्धान भइरहेको प्रहरीले जनाएको छ ।