काठमाडौँ । रोजगारीको लोभ देखाएर युके पठाउने भन्दै ठगी गर्ने एकजना पक्राउ परेका छन् । युके पठाउने भन्दै एक व्यक्तिबाटै ३७ लाख ५० हजार ठगी गर्ने ३७ वर्षीय मदन भण्डारी पक्राउ परका हुन् ।
कास्कीको अन्नपूर्ण गाउँपालिका-२ घर भइ काठमाडौँ महानगरपालिका-२६ सामाखुसी बस्ने भण्डारीलाई टेकुबाट पक्राउ गरिएको हो ।
भण्डारीले युके पठाइदिन्छु भन्दै एक व्यक्तिबाटै ३७ लाख ५० हजार रुपैयाँ लिएर फरार भएका थिए । आफू ठगिएको भन्ने थाहा पाएपछि पीडितले दिएको उजुरीका आधारमा भण्डारीलाई पक्राउ गरिएको उपत्यका अपराध अनुसन्धान कार्यालय टेकुले जनाएको छ ।
हाल पक्राउ परेका भण्डारीमाथि थप अनुसन्धान भइरहेको प्रहरीले जनाएको छ ।
