काठमाडौँ । आफ्नै कर्मचारीमाथि यौन दुर्व्यवहारको आरोपमा थुनिएका दिपेन कार्की उल्टै बढुवा भएका छन् । बैंकका एक उच्च अधिकारीले दिएको जानकारी अनुसार एनआईसी एशिया बैंकको कम्पनी सचिव रहेका कार्कीलाई सिनियर म्यानेजरमा बढुवा गरिएको हो ।
कार्कीले बैंकमा जागिर लगाइदिन्छु भन्दै आफ्नै महिला कर्मचारीमाथि दुर्व्यवहार गरेको आरोपमा कार्कीविरुद्ध प्रहरीमा जाहेरी परेको थियो । उक्त जाहेरीका आधारमा प्रहरीले उनलाई पक्राउ गरेर एक रात हिरासतमासमेत राखेको थियो । पछि उनले ती युवतीसँग माफी मागेर बैंकमा जागिरसमेत लगाईदिने भन्दै कागजसमेत गरेका थिए ।
यतिसम्म कि बैंकका केही सिनियर कर्मचारीहरु थानामै पुगेर ती पीडित भनिएकी युवतीलाई जाहेरी फिर्ता गर्न प्रेसर दिएका थिए भने ३० दिनभित्र जागिर लगाईदिने प्रलोभनसमेत देखाएका थिए । तर, कागज गरिएजस्तो न ती युवतीलाई जागिरमा लगाइयो, न कार्कीविरुद्धको उक्त केस नै अघि बढ्यो । बरु हाल बैंकले उल्टै उनै कार्कीलाई बढुवा गरेको छ ।
बैंकको कारवाहीमा पर्नुपर्ने कार्कीलाई उल्टै संरक्षण गर्दै बैंकले बढुवा गरेपछि हाल एनआईसी एशिया बैंकमा महिला कर्मचारीहरु त्राहिमाम बनेका छन् । यौन दुर्व्यवहार गरेको आरोपमा हिरासत पुगिसकेका व्यक्तिकै बढुवा भएपछि आफूहरुले असुरक्षित महसुस गरेको उनीहरुले बताएका छन् ।
