काठमाडौँ । साउन २१ गते (बुधबार) देखि काठमाडौँमा सुरु भएको ‘नाइमा मोबिलिटी एक्स्पो २०२५’ साउन २६ गते (सोमबार) सकिएको छ । अर्थमन्त्रीद्वारा उद्घाटन गरेर निकै तामझामका साथ सुरु भएको एक्स्पोको अन्तिम दिनसम्म पनि खासै उत्साह देखिएन ।
सुरुकै दिन ‘फ्ल्प’ भएको नाइमा मोबिलिटी एक्स्पो अन्तिम दिनसम्म पुग्दा ‘सुपर फ्ल्प’ भएको स्वयम् एक्स्पोमा सहभागी भएका व्यवसायीहरुले बताएका छन् ।
यसो त पहिलो दिनमा नै एक्स्पोमा खासै उत्साह र भीड थिएन । बरु एक्स्पोमा अवलोकनकर्ता भन्दा आयोजक, स्टलका कर्मचारी र मिडियाकर्मी धेरै थिए । आयोजक संस्था नाइमाले सो दिन १५ हजार अवलोकनकर्ताले एक्स्पोको अवलोकन गरेको दाबी गरेको थियो । तर, एक्स्पोमा रियल भिजिटर ५ हजार हाराहारी मात्र भएको व्यवसायीहरुले बताएका छन् ।
एक्स्पो सकिएपछि पनि नाइमाले १ लाख जनाले नाइमा मोबिलिटी एक्स्पो अवलोकन गरेको भन्दै प्रचार गरिरहेको छ । जबकी नाइमा अवलोकन गर्ने रियल भिजिटरको संख्या ३० हजार हाराहारी मात्र भएको एक्स्पोमा सहभागी कर्मचारीले बताएका छन् ।
निकै तामझामका साथ सुरु भएको नाइमा मोबिलिटी शो ‘फ्ल्प’ भएपछि थोरै भए पनि इज्जत जोगाउन नाइमाले भ्रामक प्रचार गरेको व्यवसायीहरुको भनाई छ । यसै पनि नाइमा शोमा सहभागी व्यवसायीहरु नै शोबाट सन्तुष्ट छैनन् । बरु स्टल राख्दाको खर्च समेत उठाउन धौ धौ परेपछि व्यवसायीहरुले नाइमाको एक्स्पोलाई झुर एक्स्पो भनेका छन् ।
