काठमाडौँ । सरकार र दुर्गा प्रसाईं समूहबीचको वार्ता सकिएको छ । बुधबार सिंहदरबारस्थित गृह मन्त्रालयमा सरकार र दुर्गा प्रसाईं समूहबीच वार्ता सकिएको हो । 

वार्तामा प्रसाईं समूहले सरकारसँग २७ बुँदे माग गरेको छ । प्रसाईं समूहका माधव प्रसाद खतिवडाले २७ बुँदे मागपत्र गृहमन्त्री ओमप्रकाश अर्याललाई बुझाएका छन् ।

प्रसाईं समूहले बुझाएको २७ बुँदे मागपत्रमा ऋण मिनाहको विषय पनि उल्लेख गरिएको छ । ‘सर्वहारा वर्ग र भुइँमान्छेले लिएको लघुवित्त र सहकारीको २० लाख भन्दा मुनिको ऋण मिनाहा गरिनुपर्ने ।’, मागपत्रको ७ नम्बर बुँदामा उल्लेख छ ।

त्यस्तै, प्रसाईं समूहले संविधान खारेज, प्रदेश संरचना खारेज, प्रत्यक्ष कार्यकारी प्रधानमन्त्रीको व्यवस्था गर्नुपर्ने, बैंक र व्यवसायी छुट्याउनुपर्ने, लघुवित्त र सहकारीको ऋण तिर्न विदेश गएका युवालाई स्वदेश फर्काएर सीप अनुसार कामको व्यवस्था गर्नुपर्ने, खाडीका जेलमा रहेका ७ हजार युवालाई स्वदेश फर्काउनुपर्ने लगायतका माग राखेका छन् ।