काठमाडौँ । स्टार्टअप उद्यम कर्जाका लागि १० हजार बढी परियोजना प्रस्ताव दर्ता भएका छन् । औद्योगिक व्यवसाय विकास प्रतिष्ठानले कार्तिक १९ गते आह्वान गरेको प्रस्तावमा १० हजार २ सय ४४ उद्यमीले परियोजना प्रस्ताव दर्ता गराएका हुन् ।
स्टार्टअप उद्यम कर्जाका लागि ८ हजार २ सय ३ जनाले अनलाइनबाट र २ हजार ४१ जनाले प्रतिष्ठानमै पुगेर परियोजना प्रस्ताव दर्ता गरेको प्रातिष्ठानले जनाएको छ ।
यसो त सरकारले चालु आर्थिक वर्षमा स्टार्टअप कर्जाका लागि ७३ करोड रुपैयाँ बजेट छुट्याएको छ । यस वर्ष परियोजना प्रस्तावका आधारमा न्यूनतम ५ लाखदेखि अधिकतम २० लाख रुपैयाँसम्म कर्जा वितरण गरिने प्रतिष्ठानले जनाएको छ ।
गत आर्थिक वर्ष २०८१/८२ मा सरकारले स्टार्टअप कर्जा प्रवाहका लागि १ अर्ब रुपैयाँ विनियोजन गरे पनि ८८ करोड ६६ लाख २५ हजार रुपैयाँ कर्जा प्रवाह गरेको थियो । विनियोजित बजेटबाट ३ प्रतिशतसम्म प्रतिष्ठानको प्रशासनिक खर्च भएको थियो भने कर्जा सुरक्षा (बिमा) का लागि २५ प्रतिशत निक्षेप तथा कर्जा सुरक्षा कोषमा राखिएको थियो ।
