काठमाडौँ । इन्धन बचत गर्न श्रीलंकाले सार्वजनिक बिदा दिने घोषणा गरेको छ । श्रीलंकाले हरेक बुधबार सार्वजनिक संस्थानहरुमा सार्वजनिक बिदा दिने घोषणा गरेको हो । 

अमेरिका-इजरायलले गरेको इरानसँगको युद्धका कारण विश्वभर इन्धनको अभाव देखिन थालेपछी श्रीलंकाले इन्धन बचत गर्न बुधबार सार्वजनिक बिदा दिने घोषणा गरेको अन्तराष्ट्रिय सञ्चारमाध्यमले जनाएका छन् ।

श्रीलंकामा भएको उच्च अधिकारीसँगको आपतकालीन बैठकमा श्रीलंकाका राष्ट्रपति अनुर कुमार दिसानायकेले भविष्यमा आउन सक्ने दयनीय अवस्थाको तयारीका लागि बिदा दिने निर्णय गरेको जानकारी गराएका थिए । 

यो निर्णयले खर्च कटौतीसँगै इन्धनको बचत हुने विश्वास गरिएको छ । युद्धकै कारण स्ट्रेट अफ हर्मुज बन्द छ । यही कारण विश्वभर पेट्रोलियम पदार्थ आपूर्ति प्रभावित बनेको छ ।