काठमाडौँ । सरकारले जाँचबुझ आयोगको प्रतिवेदन सार्वजनिक गर्ने तयारी गरेको छ । भदौ २३ र २४ गतेको जेन-जी आन्दोलनका बेला भएको घटनाको छानविन गर्न बनेको जाँचबुझ आयोगको प्रतिवेदन सरकारले आज-भोलिमै सार्वजनिक गर्ने तयारी गरेको हो ।

प्रतिवेदन कहिले सार्वजनिक गर्ने भन्ने विषयमा प्रधानमन्त्री सुशिला कार्की वरिष्ठ मन्त्रीहरुसँग आन्तरिक छलफलमा रहेको बुझिएको छ । उक्त छलफलपश्चात प्रतिवेदन सार्वजनिक गर्ने मिति निश्चित हुने स्रोतको भनाइ छ ।

गौरीबहादुर कार्की नेतृत्वको आयोगले फागुन २४ गते सरकारलाई उक्त प्रतिवेदन बुझाएको थियो । देशभरबाट उक्त प्रतिवेदन छिटो सार्वजनिक गर्न माग आईरहेको छ ।

प्रतिवेदनमा तत्कालीन प्रधानमन्त्री केपी शर्मा ओली, तत्कालीन गृहमन्त्री रमेश लेखक, तत्कालीन प्रहरी प्रमुख चन्द्रकुवेर खापुङलाई फौजदारी कसुरमा अनुसन्धान गर्न सिफारिस गरेको स्रोतले जनाएको छ । उनीहरुलाई १०–१० वर्षको कैद सिफारिस सहित प्रतिवेदन तयार भएको बुझिएको छ ।

त्यस्तै, सशस्त्रका आईजी राजु अर्याललाई तीन वर्षको कैद सिफारिस छ भने उनीहरुमाथि कार्की आयोगको सिफारिस समेतका आधारमा मुद्दा चल्नसक्ने बताइएको छ ।

त्यसैगरी, तत्कालीन गृहसचिव गोकर्णमणी दुवाडी र काठमाडौंका तत्कालीन प्रमुख जिल्ला अधिकारी छवि रिजाल र नेपाल प्रहरीका सिद्धिविक्रम शाही माथि पनि कारवाही गर्न सिफारिस गरिएको छ ।