काठमाडौँ । पछिल्लो आठ महिनामा झन्डै साढे १४ खर्ब रेमिट्यान्स नेपाल भित्रिएको छ । नेपाल राष्ट्र बैंकले सार्वजनिक गरेको तथ्यांक अनुसार फागुनसम्ममा १४ खर्ब ४९ अर्ब बढी रेमिट्यान्स नेपाल भित्रिएको हो । गत आर्थिक वर्षको सोहि अवधिको तुलनामा यो रेमिट्यान्स ३७.७ प्रतिशत बढी हो ।

विदेशमा काम गर्न गएका नेपालीहरुले फागुन महिनामा मात्रै एक खर्ब ८८ अर्ब बढी रेमिट्यान्स नेपाल पठाएको तथ्यांकमा उल्लेख छ । गत वर्षको फागुनमा एक खर्ब ५१ अर्ब रुपैयाँ रेमिट्यान्स भित्रिएको थियो ।

समीक्षा अवधिमा अमेरिकी डलरमा विप्रेषण आप्रवाह ३१.० प्रतिशतले वृद्धि भई १० अर्ब १५ करोड पुगेको छ । अघिल्लो वर्ष यस्तो आप्रवाह ७.१ प्रतिशतले बढेको थियो ।

८ महिनामा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको सङ्ख्या २ लाख ७३ हजार ५३६ र पुनः श्रम स्वीकृति लिनेको संख्या २ लाख ५१ हजार ९८५ रहेको छ । अघिल्लो वर्षको सोही अवधिमा यस्तो सङ्ख्या क्रमशः ३ लाख १७ हजार ६८ र २ लाख १७ हजार ४०३ रहेको राष्ट्र बैंकले सार्वजनिक गरेको तथ्यांकमा उल्लेख छ ।