काठमाडौँ । ‘गुण्डा नाइके’ कुमार घैँटे समूहका युवराज गुरुङ पक्राउ परेका छन् । ‘सानुभाइ’ भनेर समेत चिनिने गुरुङलाई प्रहरीले सामाखुसीबाट पक्राउ गरेको हो । 

गुण्डागर्दीको आरोपमा पटकपटक पक्राउ पर्दै छुट्दै आएका गुरुङलाई यसपटक पनि गुण्डागर्दी गरेको आरोपमा पक्राउ गरिएको प्रहरीले जनाएको छ । 

गुरुङ तिनै व्यक्ति हुन् जसलाई नेपाल प्रहरीले २०८० सालमा हतकडी लगाएर ठमेल बजार क्षेत्र घुमाएको थियो । क्लब ओम्नियाका सञ्चालक कुटपिट गरेर अभद्र व्यवहारको कसुरमा पक्राउ परेका गुरुङ पछि १० हजार रुपैयाँ धरौटीमा छुटेका थिए । 

लगत्तै उनी कुटपिट र असुलीमा संलग्न रहेको आरोपमा पक्राउ परेर छुटेका थिए । पछि फेरि कुटपिट र असुलीमा संलग्न भएको भन्दै उनी पक्राउ परेका गुरुङ फेरि छुटेका थिए । त्यसअघि पनि उनी पटक-पटक पक्राउ पर्दै छुट्दै आएका थिए ।