काठमाडौँ । पोखरा महानगरपालिकाले पोखरा अन्तराष्ट्रिय विमानस्थलदेखी अमसिंहचोकसम्म आवत जावत गर्ने हवाई यात्रुहरुलाई भरपर्दो विश्वसनिय र सुलभ रुपमा आवागमन सुविधा उपलब्ध गराउनका लागि नि:शुल्क सटल बस सेवा सञ्चालन गरेको छ । उक्त निःशुल्क सटल बस सेवाको लागत खर्च कामना सेवा विकास बैंक समेतले व्यहोर्ने भएको छ ।

पोखरा महानगरपालिकाले महानगरको वडा नं. १४ स्थित पोखरा अन्तराष्ट्रिय विमानस्थलदेखि अमरसिंह चोकसम्म दैनिक दुईवटा विद्युतिय बस सेवा दिने छन् । बिहान ६ बजेदेखी राती १० बजेसम्म सञ्चालन हुने उक्त बसहरुले यात्रुहरुलाई मुख्य सडकसम्म पुग्नको लागि लाभदायक सेवा प्रदान गर्नेछ ।

हाल पोखरा अन्तराष्ट्रिय विमानस्थलदेखी मुख्य सडकसम्म पुग्न करिव २ किलोमिटरको यात्रा गर्नुपर्ने हुँदा यात्रुहरुलाई सास्ती हुँदै आएको थियो ।

महानगरपालिकाले २०८३ आषाढ मसान्तसम्म सम्पुर्ण यात्रुहरुलाई निःशुल्क रुपमा उपलब्ध हुने गरि सञ्चालन गरेको उक्त बसहरुको सञ्चालन लागत खर्च कामना सेवा विकास बैंक समेतले व्यहोर्ने भएको छ । पोखरा महानगरपालिकाका तर्फबाट कार्यकारी अधिकृत ईश्वरीप्रसाद पोखरेल र कामना सेवा विकास बैंकका तर्फवाट पोखरा क्षेत्रका क्षेत्रिय प्रमुख शिव कुमार ढकालले उक्त लागत साझेदारी सम्झौतापत्रमा हस्ताक्षर गरेका थिए  ।

उक्त सम्झौता हस्ताक्षर कार्यक्रममा बोल्दै क्षेत्रीय प्रमुख ढकालले स्थानिय सरकारले आम सर्वसाधारणका लागि गर्ने यस्ता कार्यहरुमा बैंकले सहयोग गर्न पाएकोमा खुशी व्यक्त गर्दै आगामी दिनहरुमा समेत महानगरपालिकासँग सहकार्य गर्ने बताएका थिए । महानगरपालिकाले सञ्चालन गर्ने निःशुल्क सटल वस सेवामा सहयोग गरेकोमा प्रशासकिय अधिकृत पोखरेलले धन्यवाद दिएका थिए ।