काठमाडौँ । स्मार्ट टेलिकमका तत्कालीन प्रबन्ध निर्देशक सर्वेश जोशी पक्राउ परेका छन् । नेपाल सरकारको स्वामित्वमा आइसकेको स्मार्ट टेलिकमको बेइमानीपूर्वक हिनामिना गर्न खोजेको भन्दै प्रहरीको केन्द्रीय अनुसन्धान ब्युरो (सीआईबी)को टोलीले जोशीलाई पक्राउ गरेको हो ।

जोशीलाई ठगी तथा आपराधिक विश्वासघात सम्बन्धी कसुरमा काठमाडौँ–२ खुर्सानीटारबाट पक्राउ गरिएको सीआईबीले जनाएको छ ।

हाल स्मार्ट टेलिकम बन्द छ भने टेलिकमको सम्पत्ति नेपाल दूरसञ्चार प्राधिकरणले नियन्त्रणमा लिएको छ । नियमानुसार अनुमतिपत्र (लाइसेन्स) नवीकरण नगरेपछि ‘दूरसञ्चार ऐन, २०५३’ अनुसार स्मार्ट टेलिकमको लाइसेन्स २०८० बैशाख ३ गते रद्द भएको थियो ।

तर, सरकारको स्वामित्वमा आइसकेको टेलिकमको सम्पत्तिमा बेइमानीपूर्वक सरकारको हक टुटाउने उद्धेश्यका साथ काम गरेको पाइएपछि जोशीलाई पक्राउ गरिएको सीआईबीको भनाई छ ।