काठमाडौँ । पक्राउ पर्ने डरले बैंक छोडेका नेपाल इन्भेष्टमेन्ट मेगा बैंकका प्रमुख कार्यकारी अधिकृत (सिइओ) ज्योतिप्रकाश पाण्डे पुनः काममा फर्किएका छन् । अदालतको आदेशसँगै थुनामुक्त भएका पाण्डे नियमित काममा फर्किएका हुन् । 

पाण्डेलाई सरकारी स्वामित्वमा आइसकेको स्मार्ट टेलिकमको सम्पत्ति लिलाम गरेर सरकारी हक टुटाउने कार्य गरेको आरोपमा प्रहरीको केन्द्रीय अनुसन्धान ब्युरो (सीआईबी)ले बैशाख २९ गते पक्राउ गरेको थियो । उनलाई फोन ‘स्वीच अफ’ गरेर भाग्दै गरेको अवस्थामा पक्राउ गरिएको सीआईबीले जनाएको थियो । 

तर, पाण्डेकी श्रीमती निरु दाहालले दायर गरेको बन्दीप्रत्यक्षीकरणको निवेदनमाथि सुनुवाइ गर्दै सर्वोच्च अदालतले पाण्डेलाई थुनामुक्त गर्न आदेश दिएको थियो । सोही आदेश अनुसार उनी थुनामुक्त भएका हुन् ।

यो पनि:अनुसन्धान नै नसकी हाजिरी जमानीमा छुटेका सिइओ पाण्डे नियमित काममा फर्किए, प्रमाण नष्ट हुने जोखिम !

अदालतको आदेशको अर्थ उनलाई थुनामा राख्नुपर्दैन भन्ने हो । तर, उनीमाथि स्मार्ट सेल प्रकरणमा सीआईबीले अनुसन्धान गरिरहेको छ । अनुसन्धान चलिरहेकै बेला उनी नियमित काममा फर्किएका छन् ।

यसो त उनले पक्राउ पर्नुअघि नै पक्राउ पर्ने डरले बैंक छोडेको बैंकका एक सञ्चालकले पुष्टि गरेका थिए । तर, पाण्डेले बैंक छोडेको खबर सार्वजनिक भएपछि बैंकले उनको बचाउ गर्दै उनी बैंकमै रहेको विज्ञप्ति जारी गरेको थियो । तर, यता बैंकले उनी बैंकमै छन् भनेर झुठो विज्ञप्ति जारी गर्दा उनी भने भाग्दै गरेको अवस्थामा सिन्धुलीबाट पक्राउ परेका थिए ।

यो पनि:बैंकले ‘सिइओ काममै सक्रिय हुनुहुन्छ’ भनेर झुटो विज्ञप्ति जारी गर्दा सिन्धुलीको बसपार्कमा राती के गर्दै थिए पाण्डे ?

हाल उनी काममा फर्किएका छन् । उनी काममा फर्किएसँगै स्मार्ट सेल प्रकरणमा उनको संलग्नताको प्रमाण नष्ट हुने जोखिम बढेको छ ।

पाण्डे काममा फर्किएसँगै केही बैंक सञ्चालकले प्रमाण नष्ट हुने र बैंक झन् विवादमा तानिन सक्ने भन्दै आवाज उठाएका छन् । तर, उनी भने दादागिरी शैलीमा बैंक गइरहेका छन् । उनको यस्तो दादागिरी शैलीबाट बैंककै अन्य हाकिमहरु समेत वाक्क भएका छन् । यतिसम्म कि बैंकका केही उच्च पदस्थ कर्मचारीसँग पाण्डेको राम्रो ट्युनिङ नै नभएको बैंककै कर्मचारीहरुले बताएका छन् ।

यो पनि:अनुसन्धान नै नसकी हाजिरी जमानीमा छुटेका सिइओ पाण्डे नियमित काममा फर्किए, प्रमाण नष्ट हुने जोखिम !