काठमाडौँ । कपडा किनेर नक्कली नोट दिने युवक पक्राउ परेका छन् । ललितपुरको लगनखेलस्थित एक पसलमा कपडा किनेर नक्कली नोट दिने १९ वर्षीय युवकलाई प्रहरीले पक्राउ गरेको हो । 

प्रहरीका अनुसार उनले कपडा किनेर दिएको नोटमा शंका लागेपछि पसलेले प्रहरीमा खबर गरेका थिए । 

नक्कली नोटको कारोबार भएको भन्ने सूचना पाए लगत्तै लगनखेल पुगेको जिल्ला प्रहरी परिसर ललितपुरको टोलीले ती युवकलाई पक्राउ गरेको हो । ती युवकको साथबाट प्रहरीले ५ सय दरका १६ थान नक्कली नोट बरामद गरेको छ । 

ती सबै नोटमा एउटै नम्बर भएको प्रहरीले जनाएको छ । उनलाई नक्कली नोटको कारोबार गरेको अभियोगमा पक्राउ गरिएको प्रहरीको भनाई छ । प्रहरीसँगको बयानमा ती युवकले उक्त नोट आफूलाई अरु कसैले दिएको बताएका छन् । हाल प्रहरीले उनका साथीहरुमाथि पनि अनुसन्धान सुरु गरेको छ ।