काठमाडौँ । आज (जेठ १५ गते) आगामी आर्थिक वर्षको बजेट सार्वजनिक हुँदैछ । अपराह्न ४ बजे बस्ने राष्ट्रिय तथा प्रतिनिधि सभाको संयुक्त बैठकमा अर्थमन्त्री डा. स्वर्णिम वाग्लेले बजेट प्रस्तुत गर्न लागेका हुन् ।

बजेट जेठ १५ गते नै ल्याउनुपर्ने बाध्यकारी संवैधानिक व्यवस्था छ । सोही व्यवस्था अनुसार नै बजेट ल्याउन लागिएको छ ।

बजेट प्रस्तुत गर्ने कार्यक्रममा प्रधानमन्त्री, मन्त्रिपरिषदका सदस्य, राष्ट्रिय योजना आयोगका उपाध्यक्ष, गभर्नर लगायतको सहभागिता रहनेछन् । यसअघि राष्ट्रपति रामचन्द्र पौडेलले प्रस्तुत गरेको नीति तथा कार्यक्रम दुवै सदनबाट पारित भएपछि सरकारले बजेट ल्याउन लागेको हो ।

यसपालीको बजेट तोकिएको आकारभन्दा ठूलो आउने स्रोतको दाबी छ । यसपालीको बजेटले मध्यमवर्गलाई प्राथमिकतामा राखेको अर्थ मन्त्रालय स्रोतले बताएको छ । स्रोतका अनुसार कर्णाली लगायतका प्रदेशका योजनालाई सरकारले बजेटमा प्राथमिकतामा राखेको छ ।