काठमाडौँ । जनता समाजवादी पार्टी (जसपा) का प्रदेश सांसद सरोज सिंह घर लेनदेनको मुद्दामा दोषी ठहर भएका छन् । मधेश प्रदेश सांसद सिंहलाई विशेष अदालतका अध्यक्ष सुदर्शनदेव भट्ट र सदस्यहरु उमेश कोइराला र विदुर प्रसाद कोइरालाको इजलासले दोषी ठहर गरेको हो । 

उनीमाथि योजना छनोटमा बजेटको एक तिहाइसम्म घुस मागेको आरोपमा अख्तियार दुरुपयोग अनुसन्धान आयोगले घुस लेनदेनको मुद्दा दायर गरेको थियो । 

दोषी ठहर गर्दै विशेष अदालतले सिंहलाई चार वर्ष कैद, विशिष्ट पदमा बसेर कसुर गरेको आरोपमा थप एक महिना कैद र ३८ लाख ५० हजार रुपैयाँ जरिवानाको फैसला सुनाएको छ । 

अदालतले उनले आफ्नो खातामा बुझेको ३८ लाख ५० हजार रुपैयाँ पनि जफत गर्न आदेश दिएको छ । त्यस्तै, प्रदेश सांसद सिंहबाट क्षतिपूर्तिबापत एक लाख ५४ हजार रुपैयाँ असुल गरी पीडित राहत कोषमा दाखिला गर्न पनि आदेश दिएको छ ।