काठमाडौँ । रसुवागढी भन्सारका प्रमुख भन्सार अधिकृतसहित ९ जना कर्मचारी जिम्मेवारी मुक्त भएका छन् । ईभी गाडीको शंकास्पद भन्सार जाँचपास भएको प्रकरणमा अर्थ मन्त्रालयले भन्सारका प्रमुख अधिकृतसहित ९ जनालाई जिम्मेवारीमुक्त गरेको हो । 

रसुवागढी भन्सार कार्यालयबाट जिम्मेवारीमुक्त गरिएका उनीहरुलाई अर्थ मन्त्रालयले विभागमा तानेको छ । 

बजेटअघि नै करका दर हेरफेर हुने सूचना चुहिँदा नाकामा नआउँदै बिवाईडीसहित सयौँ ईभी गाडीको भन्सार जाँचपास गराएको भन्ने उजुरीका आधारमा हाल भन्सार विभागले अनुसन्धान अघि बढाएको छ ।

अनुसन्धानका लागि छानविन समितिसमेत गठन गरिएको छ । सोही छानविन समितिको सिफारिसका आधारमा जेठ २० गते नै रसुवागढी भन्सारका कर्मचारीहरुलाई जिम्मेवारीमुक्त गरिएको अर्थमन्त्रीका स्वकीय उपसचिव नवीन ढुंगानाले जानकारी दिएका छन् । 

केही दिनअघि मात्र भन्सार छलीको आशंकामा सशस्त्र प्रहरीले बिवाईडीका ईभी गाडीसहित ७ सय ७४ गाडीहरु नियन्त्रणमा लिएको थियो । हाल उक्त विषयमा अनुसन्धान भइरहेको भन्सार विभागले जनाएको छ ।