काठमाडौँ । अर्थमन्त्री स्वर्णिम वाग्लेले सरकारले गरिरहेको ठूलो आर्थिक विचलनमाथिको अनुसन्धानका कारण लगानीकर्ता त्रसित हुँदा स्टक मार्केट घटेको हुनसक्ने आशय प्रकट गरेका छन् । प्रतिनिधि सभाको बैठकमा सांसदहरुले उठाएको प्रश्नको जवाफ दिँदै अर्थमन्त्री वाग्लेले यस्तो बताएका हुन् । 

उनले अहिले सरकारले पूँजी बजार जोडिएको ठूलो आर्थिक विचलनमा १ खर्ब बढी बिगो मागेर मुद्दा चलिरहेको बताए । 

देशै हल्लाउने र भित्रभित्रै मक्किसकेको कुरालाई ट्रयाकमा ल्याउन चलिरहेको अनुसन्धानको दायरामा आफू पनि पर्ने वा तानिने त्रास केही लगानीकर्तामा भएको हुनसक्ने अर्थमन्त्रीले बताए । 

‘पूँजी बजार इत्यादिमा ठूलो विचलन आएको कुरा भर्खरै १ खर्ब भन्दा बढीको बिगो मागेर मुद्दा चलिरहेको छ । त्यसको केन्द्रबिन्दुमा हाम्रो क्यापिटल मार्केटहरु थिए । इन्स्योरेन्स, स्टक सेक्युरिटिज, यत्रो विचलन, देशै हल्लाउने, भित्रभित्रै मक्किसकेको कुरालाई हामी ट्रयाकमा ल्याउँदै छौँ ।’, उनले भने, ‘यो अनुसन्धानको दायर बढ्दै जाँदा म पनि पर्छु कि ! हामी पनि तानिन्छौँ कि भन्ने त्रास केही लगानीकर्तामा भएको हुनसक्छ ।’

त्यस्तै, अहिले सरकार ‘गुड गभर्नेन्समा निर्मम ढंगले अघि बढ्दै गर्दा १०-१५ वर्षका आचरणगत र नियतगत कुराहरुबाट केही लगानीकर्ताहरु ‘वाच एण्ड वेट’को नीति रहेको अर्थमन्त्री भनाई छ । 

उनले अहिले सरकारले १-१ घण्टाको स्टक मार्केट नभएर युगयुगको लागि दूरगामी नीतिमा काम गरिरहेको पनि उल्लेख गरेका छन् ।

‘हामी १-१ घण्टामा स्टक मार्केटको इन्डेक्स तल जान्छ कि माथि जान्छ भनेर हेर्दैनौँ ।’, अर्थमन्त्री वाग्लेले भने, ‘हामी युगयुगको लागि दूरगामी नीतिमा काम गरिरहेका छौँ ।’